Samling Fosshaugane Campus 17. oktober
Publisert 19.10.2009

Om det var lite folk på den første samlinga i Sogndal, så var det i alle høve fullt denne gongen. Ca 100 frammøtte er fantastisk bra! Nordfjordingane vann frammøtet, sogningane tapte. Forventingane var store.
     Oddstein Haugen er nestleiar i Sogn og Fjordane Idrettskrins. Han ynskte oss velkomne og skrytte av Nordfjordingane som hadde stilt så mannjamnt opp. Han gjorde vidare merksam på at vitjinga i Sognahallen ikkje var gratis, det kostar faktisk 12 kr. timen å parkere bilen utanfor. Det spreidde seg ei viss uro i forsamlinga. Det heile enda med at dei som hadde dårleg samvit måtte ut og  grave i lommeboka for å tilfredsstille parkomaten. Webmaster måtte ut med 60 spenn før det vart fred i maskina...


Då det heile hadde roa seg, kom Karl Erik Bøhn på podiet. Han heldt eit morosamt og engasjerande innlegg. "Hald fokus, gjer det trenaren seier og la vere å kome med motførestillingar". "Sei ifrå når noko spesielt er på ferde" og: "Du kan ikkje undervurdere folk nok". Det gjeld med andre ord å gjenta og gjenta og gjenta.

Det synte seg at Bøhn var fan av Sogndal Fotball, noko som resulterte i at han vart ei trøye rikare.

For eiga rekning legg eg til: For skiskyttaren kan eit medvite forhold til naturlege, mentale reaksjonar vere det som avgjer om du vinn eller ikkje. Det skotet du skaut kan du ikkje gjere noko med, men du kan lære korleis du bør tenke dersom skotet vart ein bom. Eg vil vone at ToppIdrett kan dra inn ressursar på spesifikk trening i å overstyre naturlege reaksjonar ved neste korsveg.

 

Den sympatiske tikamparen Niclas Wiberg delte villig erfaringane sine innan trening med oss. Dette gjorde han på ein glimrande måte saman med hovudtrenaren sin, Kjell frå Ôland. Det ligg ufatteleg mykje trening bak suksessen hans, men han minte om kor viktig det er å kvile innimellom. Sjølv trenar han 3 dagar og kviler den 4. Dagane før store tevlingar slappar han heil av. Han fortalde og eindel om kosthald.
Det siste 2 åra har Olav Rafoss hjelpt til med slyngetrening, noko som har gitt god uttelling for Niclas.
Kjell frå Öland viste seg å vere ein hyggeleg og målmedviten trenar. Han la vekt på at det er viktig å finne trening som fungerer for utøvaren. Det som ikkje verkar, må ein slutte med!
Steinar Mundal har lang erfaring med å trene dei beste skiløparane. Han snakka mellom anna om kva som er høveleg treningsmengd, dei som fell ifrå og kor vanskeleg det kan vere å rykke opp i juniorsjiktet. Det er ingen gitt å vite kven som vert god før det har gått nokre år!
Etter denne gjennomgangen var det tre paralelle økter. Den eine tok føre seg handball (Karl Erik Bøhn), den andre trening i rulleskiteknikk (Steinar Mundal) og den tredje spesifikk/funksjonell trening (Niclas Wiberg og Olav Rafoss). Webmaster er ganske viss på at dei aller fleste fekk med nye impulsar heim! Eg har lagt ut 50 bilete frå samlinga her.

Startsamling Ullsheim 5. mai
Publisert 25.05.2009

Denne kvelden var det kjempeoppmøte! Dette er svært inspirerande for dei som arbeider med prosjektet! Det var gjennomgang av klubb- og prestasjonsutvikling før det var gruppearbeid om stoda i TSN. Etterpå vart det utarbeidd ein utviklingsplan for teamet. Denne bør alle sjå nøye gjennom! Her er lenker til dokumenta: Klubbutvikling - Prestasjonsutvikling - Utviklingsplan TSN

TOPP Idrettsutvikling!
Publisert 19.04.2009

18. april vart den første fagsamlinga i prosjektet TOPP Idrettsutvikling skipa til på Campus Fosshaugane i Sogndal. Dette var ei stimuleringssamling for utøvarar og trenarar som er med i prosjektet. Team Statkraft Nordfjord var sjølvsagt til stades. Prosjektleiinga hadde skaffa innleiarar av ypperste klasse og alle vi snakka med i TSN fann samlinga svært nyttig. Dersom Idrettskrinsen gir oss løyve, skal vi legge ut presentasjonane her seinare. Nedanfor følger ei kort oppsummering av samlinga, saman med webmaster sine subjektive inntrykk ;-)


Leiar for Sogn og Fjordane Idrettskrins Ingar Breilid ynskte oss velkomne til denne første samlinga.


Arvid Andenes i Sparebanken Sogn og Fjordane fortalde om kvifor dei brukar fleire millionar kvart år på prosjekt som dette og kor viktig det er at lokalt næringsliv stør opp om idrett og kultur.


Sigmund Aasen frå Olympiatoppen gjekk nøye gjennom kvifor dei beste vart best. Her er det fellestrekk som vi alle kan ta lærdom av! Han har arbeidd mykje med landslaget i skiskyting tidlegare.


Stian Grimseth er tidlegare vektløftar. Han fortalde om både opp- og nedturar. Det går ikkje alltid slik ein trur, nei! I ungdomen fekk han til dømes høyre at: "Nokon vektløftar vert du i alle høve IKKJE, Stian". Kor feil er det eigentleg lov å ta, tru? 


Olav Rafoss er gründer og manuellterapeut. (Den gamle framandordboka mi kan fortelje at ein gründer er ein som startar ei verksemd med kortsiktig forteneste for auget, gjerne eit svindelføretak.) Han snakka om basistrening og nytten ein kan ha av å trene med "Slynge". Dette siste kjem vi tilbake til seinare, TSN har fått tildelt kvar si slynge i Stryn og på Eid som ein del av TOPP-satsinga.

Etter dette var det paralelle økter der Sigmund Aasen ga deltakarane ei grundig innføring i treningsplanlegging, Stian Grimseth i eksplosiv styrke/spenst og Olav Rafoss i praktisk slyngetrening. Eg tvilar på at nokon av dei som var med på dette kurset tvilar på korleis dei bør trene fram mot neste sesong for å verte vesentleg betre enn dei er idag!


Det er fleire fordelar med slyngetrening, mellom anna trenar ein fleire muskelgrupper samstundes og det vert enklare å avsløre små detaljar som kan gjere utøvaren mykje betre.

Det tok til dømes mindre enn eit minutt å finne at Bjørn Erik er ustabil i hoftepartiet og vil ha eindel å vinne på å trene opp akkurat dette. Her er slynga festa i ribbevegg og fotbrett er brukt.


Olav Rafoss synte oss også korleis det kan trenast i hengande slynge. Planen er at han kjem til TSN når slyngene våre er montert, mellom anna for å finne kva den einskilde bør trene spesielt på.

Sjølv eg fann samlinga utruleg lærerik og alle bør sjå fram til kva prosjekt TOPP Idrett kan tilføre TSN av ny kunnskap og kompetanse!